ती स्त्री असते

पदराला बांधुन सुख
दु:ख साऱ्याचे पुसते
भरल्या डोळ्यांना लपवत
साऱ्याच्या सुखासाठी हसते
                        ती स्त्री असते

राधा वाढा , उष्टी काढा
यालाच संसार मानते
झेलून वेदनेचा डोंगर
ममतेचे गीत गाते
                      ती स्त्री असते

बाबांची परी , आईची छकुली
भावाची लाडली होते
आजी - आजोबांची धाकुली
कधीतरी मग परकी होते
                     ती स्त्री असते

एकाच जन्मात ती
दोन जीवन अनुभवते
माहेरात आपुलकीचे झाड लावते
सासरची शीतल सावली होते
                    ती स्त्री असते

कणखर ती
कधी जिजाऊ , कधी झाशीची राणी होते
इतके सगळे सहन करून
बाकीच्यांना ती प्रेरित करते
                    ती स्त्री असते

रडते ती , कुढते ती
 ती खूपच हळवी असते
सगळ्यांनीच सोडला धीर
तेव्हा मात्र खंबीर असते
                    ती स्त्री असते
 
                                                                                                नवनाथ ठोंबरे (औरंगाबाद)