बघा मांडला संसार
निळ्या आभाळाच्या खाली
असा उघडा - बोडका
नाही घर, नाही वाली..... {१}
चंद्र - चांदणे पांघरू
घेऊ नभाची चादर
दुःख येता जीवनात
असू लढण्या सादर..... {२}
गरजेपुरती भांडी
अंग झाकाया कपडे
चिंता आमची देवाला
आम्ही गरीब - बापडे..... {३}
गुरे, वासरे सोबती
भटकंती होई नित्य
गरीबाला नाही कोणी
हेच आहे एक सत्य..... {४}
माया आईची न्यारीच
तान्ही मुले पदरात
अन्न मिळाया पोटाला
बाप राबे शिवारात..... {५}
अंधाराची नाही तमा
उन्हाळ्याच्या नाही झळा
नसे थंडीची काळजी
सोसू आनंदाने कळा..... {६}
नशीबाने जरी आम्ही
गरीबीत रे जन्मलो
तरी मनी निरंतर
आम्ही श्रीमंत जगलो
लेखक - नवनाथ ठोंबरे
कोणत्याही टिप्पण्‍या नाहीत:
टिप्पणी पोस्ट करा